جنــــة ونار .. نار وجنــــــة

جليل الهلالي

علينه اتحزموا صوبين صوب وصوب من عدنه
هذاك الصوب نعرفهم
يكرهون بعهد جدنه
شجه الها لصوب وتحزم
وبيهم كل ولد عمنه
ولك يبن العراق اليوم
كلها اتحزمت ضدنه
علينه اتكلطوا بجراد
واحنه الحقل الاخضر تونه وردنه
انه الانخاك .. لو تنخاني
اولاد العمام احنه
اخوه ابشكة المنشار
واعدانه اهم منه
ولك دصحة ان ما انخاك
بس الينتخي ربنه
النخل كل ما عله ابزوده
النخل نعتوه
عيطه وما ترطبنه
نسوا خير النخل النه
ونسوا خيرات هالنخلة اعله موطنه
ولا كالوا الفيهه احتمت هالعربان
ومن كثر السعف نبني صريفتنه
ولا كالوا جذعهه درع للشدات
وجذعهه الفتح باب خيبر من تحاربنه
اها يا خوي
انه الانخاك .. لو انته
ولك انه اخوك
وهذا هو البيت
يعمر منك ومني
ولك ما نرتجي منه
ولك هالبيت
هذا السورة ابراهيم
وادم من نزل
ما نزل عنه ايعيد
ربك صوراه ونزل يمنه
هذا البيت اله حرمات
اله حدود المنازلنه
اخوك انه ابن امك
والدره الرضعناها فرد لبنه
والحد باقي هوه الحد
من تشتمر عنه اتصير مو ابنه
احنه العلمونه الاهل
نشري الكاع
لو هالكاع ضاعت يا رخص دمنه
ولك شتكول
هاي الكاع ضاعت والشروهه اوغاد
جا وليامتا احزامك يظل تبنه
مو انته الكلت يا هيه
ياهو اليوصل الحدنه
ياهو اليكرب وفتهه تجينه اكوام
كوم الكوم نلعب بيه ونعجنه
جا وين الحجي يا خوي
شو سيفك
علي اتشهره وتسنه
ولا جنك اخو
ودره الرضعناهه
فرد دره
وحليب الطاهر
الرضعنه واحنه ازغار
من ثدي الحبيبة امنه
ولك جنك نسيت امك
و باعوك وشروك ابرخص يا دينار باكوك الحرامية
وشراك
الما يفرز النار والجنه
شراك الما يفرز النار والجنه